【明報專訊】大學飯堂嘅「雙餸飯」可謂學生最愛之一，有讀者向Emily投訴，話近日嶺大飯堂嘅「雙餸飯」無咗伴碟嘅椰菜。Emily噚日去咗現場睇睇，雙餸飯包熱飲賣24.5元，Emily食嘅常餐就只係18.5元，仲好好食𠻹。
嶺大校園內嘅飯堂早年因應學生要求，喺雙餸飯提供伴碟蔬菜，仲可以「任叫多菜多飯」。點解今個月起要停止供應呢？飯堂黃經理同Emily講，由於近期菜價高企，加上好多學生都會叫加菜，好難控制成本，若以𠵱家嘅菜價計算，伴碟菜會額外增加1至2元成本，喺唔能夠調整定價嘅前提下，只能無奈叫停。咁想食蔬菜嘅學生又有乜選擇？佢多番強調，已經新增咗「清炒時蔬」，希望滿足到學生需要。
Emily問過香港入口蔬菜批發商會會長袁昌，佢話𠵱家回暖，蔬菜來貨較穩定，近兩星期菜價已較2月高峰期回落，小棠菜每斤批發價約4.5元，而椰菜仍較平時貴，每斤近5元。
;)
