【明報專訊】趁着復活節假期，新民黨主席葉劉淑儀搞嘅海上絲綢之路協會交流團終於起行，帶百幾個香港大學生北上到福建泉州「起機」，齊齊去了解「一帶一路文化起源」。 帶過百大學生考察海上絲路 搞得交流團少唔得起早摸黑，不過葉太跟足行程，晨早流流5點起身出發，同學生齊齊搭高鐵北上。可能係自己籌備已久嘅BB終於成事，心情緊張，葉太笑言自己瞓得4粒鐘，一早就醒咗。 行程傍晚又安排參觀廈門大學，葉太難得重溫大學時光，試食廈大飯堂。唔好睇小呢個碟頭飯，有5餸1湯，白飯任𢳂，仲有飯後水果。葉太都讚食得好又食得飽，話比佢當年港大讀書個陣伙食好味得多！ 唔知係咪有感而發，葉太又講到，唔少國家嘅學生會唔搞政治，以爭取學生福利為主。係咪暗示緊香港啲大學學生會太過關心政治呢？
|
| |
| |
;){kind=small}
;)
