【明報專訊】1956年成立嘅建築師學會今年踏入60周年紀念，為咗慶祝學會邁向「花甲之年」，今年將以「築動香港60載」為主題舉辦連串活動。會長吳永順話學會見證香港時代變遷，希望「通過建築去感動香港700萬人」。

「頭炮」活動係上月揭幕、於九龍公園舉辦嘅「港深城市建築雙年展」，展覽為期3個月至2月底；至於6月就會喺太古廣場舉行「建築師學會2015年年獎頒獎暨展覽」，到時仲會一次過展出過去咁多年嚟嘅得獎建築項目。

「築自室」藝術展覽9月再辦

至於學會喺2013年首辦、反應好好嘅「築自室」藝術展覽，今年9月將再舉辦，希望透過藝術裝置、影片、攝影、圖像繪畫等唔同嘅創作，令公眾透過藝術接觸建築。學會今年更取得「第17屆亞洲建築師協會周年大會」主辦權，係建築業界嘅盛事，屆時會有19個亞洲國家同地區嘅500名代表出席。

吳永順並親自設計學會60周年logo，佢話當時靈機一觸，用番建築師傳統嘅繪圖工具，包括丁字尺、圓規、呈60度角嘅三角尺等，砌出學會英文簡稱「HKIA」，噚日仲換上新卡片𠻹。