【明報專訊】立法會噚日恢復二讀版權條例修訂草案，但開始無耐就要先辯論由工黨何秀蘭提出嘅中止待續動議。無黨派黃毓民更一度同黃碧雲引發罵戰，碧雲(圖)仲同記者講，「我嘅第一次畀咗佢(黃毓民)」。嘩！呢句說話引起人無限遐想，但大家唔好誤會，其實碧雲講嘅只係佢入議會以來首次提出點人數啫。 碧雲第一次提點人數 話說毓民發言時批評泛民無積極參與「拉布」，「無意志」阻止草案通過；當佢提到民主黨主席劉慧卿(卿姐)嘅名，準備批評對方嘅時候，碧雲突然提出點人數，令毓民發言要暫停，結果毓民發難，鬧對方「垃圾」，碧雲就反問佢「又話拉布？」，兩人窒來窒去，在席嘅商務及經濟發展局長蘇錦樑見狀都忍唔住大笑。 碧雲事後被問到係咪為卿姐報復毓民而要求點人，佢回應話「唔一定係」，「有條規矩講幾時先可以點人？」，但佢就半講笑話「我嘅第一次(點人數)畀咗佢(黃毓民)」。 不過，黃碧雲否認自己點人數係參與拉布，話只係因為支持中止待續，而黨內亦無討論過點人。 卿姐其後喺會上發言，就話提出點人數嘅碧雲「講說話非常尖銳」，好支持對方，希望可以同佢一齊將民主黨立場講畀市民聽咁話。
|
| |
| |
;){kind=small}
;)
