蔣麗芸「黐線」論 精神科醫學院斥歧視

蔣麗芸「黐線」論精神科醫學院斥歧視

[2015.12.17] 發表

【明報專訊】立法會大會噚日不停有議員點人數，民建聯蔣麗芸(Ann姐)忍唔住，話聽得太多「廢噏」要離開會議廳「唞唞氣」，否則如果好似主席曾鈺成咁坐定定，就會患上「斯德哥爾摩症候群」。佢又形容拉布議員提出響鐘點人數就好似放火，點人數嘅議員放火放得快，但其他議員就「救火救唔切」。

「醫生聽精神病人太多嘢，自己都黐線埋」

Ann姐又用精神病做比喻，話最有可能患上精神病嘅就係精神病醫生，因為「精神病醫生聽精神病人講太多嘢，聽聽吓自己都黐線埋」。Ann姐呢個講法，引嚟身為醫生嘅公民黨郭家麒不滿，批評Ann姐嘅言論偏激，侮辱同歧視精神病人，話即使喺議會立場不同，都唔應該攞精神病人嚟講，話社會花咗好多心機令社會接納精神病人，Ann姐應該就自己嘅說話向病患者同家屬道歉。

精神科醫生曾繁光接受Emily同事訪問笑言，若蔣麗芸聽得太多議員嘅說話令自己都「病埋」，可以「叫佢嚟睇我啦」，又話會有「聖誕大酬賓」，畀佢八折優惠。

事件仲有餘波，香港精神科醫學院之後發出聲明，話對一位立法會議員嘅「不實言論深表遺憾」。聲明指呢番言論歧視全港20多萬正在接受精神科治療嘅市民，更令未有治療嘅病人諱疾忌醫，話呢啲扭曲及負面嘅言論，只有令精神科服務百上加斤。

蘇錦樑請食蛋撻被嘲「蛇齋餅糉」

另外，噚日開會期間，會議廳前廳出現幾盤小食，包括蛋撻、叉燒酥，旁邊有「商務及經濟發展局局長致意」字牌，相信係蘇錦樑留畀議員享用。不過泛民議員似乎唔多領情，人民力量陳偉業話，上周三大會流會，蘇局長今次出動到蛋撻雞批，「不知會否成功攏絡民心？」公民黨陳家洛就話蘇局長將「蛇齋餅糉」帶去立法會前廳，反問成何體統，又話「好人勿近」。