【明報專訊】噚日係監警會主席郭琳廣發表任內第一份周年報告，近年監警會有個傳統，喺周年報告公布活動安排委員們出席與傳媒聚會交流，唔少委員噚日都好主動同Emily及其他記者互相了解。不過主席郭琳廣唔知係咪貴人事忙，其間頻頻睇手機，或係集中同身邊委員「吱吱噚」，幾乎冇乜同記者傾偈。
有同枱記者諗住打開話題，問吓報告內容，主席一聽到就耍手擰頭，交個波畀旁邊嘅PR答。臨近聖誕，Emily又八卦吓主席有冇計劃外遊、使唔使開會趕工交佔中報告，郭琳廣終於「開金口」，話聖誕一如既往留喺香港過，因為兩個喺英國讀書嘅女會返嚟陪佢。原來佢兩個囡囡都喺英國讀法律，但當大家想多傾兩句時，主席似乎就唔想多提家事，無多談嘞。
委員未知是否續任
臨近年尾，幾個監警會委員嘅任期亦屆滿，包括劉文文、蘇麗珍、鄭承隆、陳培光等，Emily聽講話委員至今未收到係咪需要續任嘅安排。
;)
