【明報專訊】噚日係長者日，梁班子未有太多公開活動，但原來唔少官員噚日中午一齊聚集禮賓府，同大約100個來自18區嘅長者茶敘、傾吓偈。教育局長吳克儉、商務及經濟發展局長蘇錦樑，事後都喺facebook上載咗活動相片，成班官員仲一展歌喉，好似夾晒band咁對住班長者開演唱會一樣。

禮賓府招待百個長者

蘇錦樑就話佢擔當鼓手，同局長們一齊獻唱《舊歡如夢》、《分分鐘需要你》同Today等歌曲。吳克儉就話自己同佢嘅政治助理施俊輝，一齊獻唱《月亮代表我的心》。

特首梁振英更加上載一條短片，係由佢、梁太唐青儀、政務司長林鄭月娥及一眾局長，一齊合唱祝壽歌，祝一眾老友記年年有今日，但唔少官員仍然都要拎住歌詞貓紙。

環境局長黃錦星就與扮演「大嘥鬼」嘅副局長陸恭蕙及局長政治助理區詠芷合作「棟篤笑」環節，政制及內地事務局長譚志源及民政局副局長許曉暉演出折子戲《紫釵記之劍合釵圓》，譚志源話係佢獻出初次粵曲演出，現場總算贏到長者掌聲。