麥潤培禁用民主黨名義出選

【明報專訊】沙田區議員麥潤培向來同地區黨友關係麻麻，前排民主黨新東支部會員大會，兩次都以大比數通過不信任動議，決定唔畀麥潤培用民主黨名義參選區議會，前晚民主黨開中委會處理麥潤培上訴，但都唔夠票推翻大會決定，據聞係咁多年嚟，民主黨第一次有現任議員唔可以用黨名議出選競逐連任。

麥潤培同Emily講，佢會再同黨溝通，至今無諗過退黨，但要考慮埋佢班幕僚諗法，又話其實呢刻都未諗係咪會參選競逐連任。至於點解同黨關係搞到唔可用民主黨名義參選，麥潤培話過去嘅事唔方便講，自己一向會直斥其非，某啲說話踩中某啲人諗法絕唔出奇。

由麥潤培facebook所見，過去一段時間都勤力落區，似乎仍有意再參選，但最近就上載咗一幅掛喺區內嘅橫額，竟然無民主黨logo(圖)，反而印上「青靜動力」嘅名稱同標誌，不過佢強調，其實佢區內其他banner都有印民主黨嘅，只係咁啱呢幅banner位置係借其他團體，咁無理由用人哋個位去宣傳民主黨啫！