民主黨地區工作結集出書

【明報專訊】區議員同社區主任出工作報告派街坊就見得多，將地區工作嘅點滴寫成書都比較少見。民主黨一班地區工作者就將佢哋喺報紙專欄嘅29篇文章集結成書，希望同大家分享佢哋對地區工作嘅觀察同見解。

負責編書嘅鄒旻芳噚日同Emily講，成個出版過程係年頭開始，嗰陣張文光呼籲一班地區工作者，除咗喺地區「耕田」之外，都要將自己嘅見解寫出嚟，喺報紙同大眾分享。

Emily見出書時機咁近區選，就問下民主黨副主席羅健熙出書係咪想為區選造勢，點知羅健熙就話，出書對地區工作嚟講係「好離地嘅嘢」，只係想試下用唔同形式將佢哋嘅工作表達出嚟。羅健熙仲話，社區工作好多時都係無乜鎂光燈嘅嘢，當大家見到個社區好好，可能背後係有人做咗好多嘢，希望今次出書可以令好多默默耕耘嘅工作畀大家知道。

對於最近有團體話無見過民主黨嘅地區工作者「真係做嘢」，羅健熙就同Emily講，佢哋自己通常唔會話其他人唔做嘢，而係話畀人聽自己做咗乜嘢。佢仲話如果批評者係有料到，就唔會咁虛無飄渺咁話人唔做嘢，叫佢諗下自己做咗啲咩咁話喎。