曾江想同四哥握手 謝賢收火﹕過咗去 無嘢啦

曾江想同四哥握手謝賢收火﹕過咗去無嘢啦

[2015.08.14] 發表

【明報專訊】謝賢(四哥)不滿曾江在《4個小生去旅行》拍攝期間表現的態度，前日大動肝火在記者會怒摑曾江，卻被胡楓隔開飛甩眼鏡成為全城熱話。事隔一日，四哥怒火稍減，昨日接受訪問時說﹕「過咗去啦，講完就無嘢！」不過他透露下周一首播飯局取消。而曾江被問到有否嬲四哥？他說﹕「我唔需要嬲任何人。」但他認為今次事件起因該是「窒過火」，他稱相識數十年，未料到對方心中有累積下來對自己的不滿，若有機會都想和四哥坐下來握手，大家有不滿就講清楚。

文﹕娛樂組

曾江昨日接受明報記者電話訪問時表示自己不需要嬲任何人，他說﹕「我自己都唔係一個好完美的人，亦唔覺得自己無錯。」問到四哥前天表示下周一節目首播，會宴請節目工作人員吃飯，更稱﹕「曾江夠膽就出席。」問曾江會否出席？他說﹕「如果佢有請我去，怕乜去？亦都希望藉呢個機會，大家握吓手，有什麼不滿講清楚，都相識幾十年啦。」曾江認為今次事件應該是「窒過頭」，因節目互窒是元素，大家是老朋友，這樣才夠生活化。

「窒過火」是導火線

曾江說﹕「你窒我，我歡迎，但我窒你，都希望你能夠接受，我窒阿修同阿Joe重多啦。其實都係為節目效果，不過可能窒過火，令他不開心，無想過對方心中有累積下來對自己的不滿，才會有這個火爆場面出現。」會否期待四哥道歉？曾江說﹕「我覺得他不會道歉的，人人都捧住佢，可能無人試過我這樣窒他吧！」

不評論誰對誰錯

他表示若只以無綫的酬勞根本不會考慮，今次答允拍該節目，主要因為未到過俄羅斯，另一方面很珍惜可以與一班老朋友一起去旅行，自己亦不是為博同情要求坐輪椅出鏡，他感激旅途中，3人在鏡頭前都有幫助要坐輪椅的他，鏡頭後更要多謝一名工作人員沿途照顧。整件事件上他不會去評論對與錯，因為各人心中角度與睇法都有不同。

四哥飯局改期

另一方面，記者致電謝賢，問他嬲完未？他說﹕「無嘢啦，過咗去嘞！我昨日㷫完講咗要講嘅嘢，今日就過咗去！」曾江說如果首播你請他去，他一定去，你會否請他一齊食飯？四哥透露飯局改期，主要因為想請員工吃飯，但他們趕住剪片出街，所以只好改期。

修哥叫曾江送眼鏡

至於83歲胡楓(修哥)前日在四哥與曾江衝突事件中，肩負起「隔鬥」重要角色，迅速出手擋開四哥出掌，但眼鏡被打到飛脫。修哥獲網民大讚反應勁快兼身手敏捷，他昨日接受電話訪問笑說﹕「我點勁？我都『領』咗佢(四哥)一嘢！」不過他笑言自己確實身手敏捷，證明平時注重身體健康好重要。修哥說未有致電兩人，等大家過了啖氣先。他被打到眼鏡飛脫，他笑言﹕「如果有爛一定要四哥賠畀我。(曾江應該點報答你？)送多副眼鏡畀我啦！」談到有質疑是夾埋宣傳？修哥反問﹕「點夾？係咪佢話我打喇！我就即刻起身擋？」他重申絕對不是夾，他這麼多年都未遇過這種場面。