【明報專訊】立法會議員湯家驊(Ronny)10月1號就要離開立法會，一班政情記者噚日趁Ronny仲喺立法會，為佢送上一個砌成立法會外形嘅圓形蛋糕，上面寫住「GOOD-BYE RONNY」，仲有個Ronny公仔企喺立法會門外。Ronny見到就第一時間指住個公仔話「我邊有咁靚仔呀」，仲問個公仔食唔食得。佢又深情告白，話：「好感動，記者仲有人情味過我啲同事。」 記者與助理齊歡送 其實一班記者同Ronny助理準備呢個意外驚喜已經好耐，噚日就以請佢回應問題做理由，請Ronny嚟接受「採訪」。Ronny喺唔知行家乜嘢葫蘆賣乜嘢藥下，唯有依助理要求行埋採訪區，點知有記者問：「聽講你做咗律政司長，你有咩感受？」Ronny笑住講：「你想我講咩？」又有人問：「你之後想做咩呀？」Ronny一臉認真話「我想舒舒服服，做番律師囉」，場面搞笑！ 之後Emily同一班行家送上立法會形狀大蛋糕，Ronny就負責「解散立法會」。記者再送上歡送禮物——高爾夫球手套，Ronny即時試穿，問「你哋點知我size呀？」原來Ronny話自己隻手偏細，平時自己買都未必啱，點知呢隻手套啱啱好。Emily在此祝佢身體健康，日日都咁開心啦！
|
| |
| |
;){kind=small}
;)
