【明報專訊】政務司長林鄭月娥呢兩日約見唔同嘅民主派議員討論政改，議員都會同記者講，方便大家會後採訪。不過，民協馮檢基同林太嘅會面時間一改再改，最終噚日3點45分喺政府總部見面。馮檢基之後向傳媒道歉，話因為林太事忙，一日之內改咗佢3次時間，令記者採訪造成不便。
一再推遲 11點變3點9
馮檢基話，原本約咗噚日朝早11點同林太見面，但朝早收到林太office電話，佢相信係行會未開完嘅關係，會面推遲半個鐘。後來再收到電話，話林太都係事忙，會見原訂今日進行。
但到咗噚日中午，林太親自打畀阿基，話自己多嘢做，希望噚日下午會面，因為佢今日有其他事要做，所以最終確定噚日3點45分見面；同場仲有政制及內地事務局長譚志源、特首辦主任邱騰華。呢件事睇嚟，阿基都好就得人，林太講咩時間見面，佢都可以應約。
;)
