【明報專訊】立法會審議財政預算案多時，相信今日傍晚就會正式表決，而噚日會議亦否決晒600幾條由議員提出嘅修正案，雖然預算案已拉布審議咗一段日子，但議員間嘅火花未停，噚日謝偉俊就批評議員拉布式審議預算案，好似「洗米」咁逐粒洗；工黨李卓人就話如果審議真係洗米，咁財政司長曾俊華就係「蛀米華」喎。

謝偉俊發言時話，洗米唔可以逐粒洗，只能恰當、合比例咁「洗兩洗」，唔應該「逐粒米去揑吓、搞吓」，否則由朝到晚都未洗完。

陳志全：議員發現米生蟲

人民力量陳志全(慢必)批評，用洗米比喻係輕視議員嘅責任，又話如果咁，政府就係掌控全港米倉，議員只係抽查米嘅品質有無問題，點知就畀佢哋發現啲米生蟲、有穀牛，碗碗抽出嚟都係有事，佢強調如果議員發言無意義，主席曾鈺成一早已經制止。

李卓人就形容曾俊華係「蛀米華」，揶揄對方係「蛀米大蟲」，「應洗唔洗，唔應洗就洗」。

由談預算案拉到去洗米都唔止，另一邊廂，人力陳偉業(大嚿)就拎番早前保險界議員陳健波形容表決修正案係「按傻仔鐘」嚟講，大嚿形容建制派盲目支持政府，又話「議會係傻仔議員保駕護航」。

經民聯盧偉國聽到隨即投訴，話陳偉業「無論傻仔議員講邊個，都係有冒犯性」，要求曾鈺成裁決，最終曾主席要求大嚿收回言論。