政府批資助 大愛同盟稍多過明光社
【明報專訊】政制及內地事務局除咗搞政改外,另一工作係促進不同性傾向人士、跨性別人士有平等機會,或為性小眾提供支援,當局回覆立法會嘅文件就話,喺2014/15年度批咗97萬畀合資格機構搞社區活動。Emily發現,當局批咗7.97萬元畀由歌手何韻詩、黃耀明等牽頭嘅「大愛同盟」搞座談會、歌曲創作比賽及音樂會,金額較批畀明光社嘅7.54萬元稍多。
除咗呢兩個機構,唔少獲批資助嘅都係爭取同志、跨性別人士平權嘅組織,好似跨性別資源中心、大同及香港女同盟會等。當局話2015/16年度預留相關撥款數目為125萬元,但最終獲批數目就要視乎批核結果。政府自己亦曾製作推動「不歧視、多包容」嘅聲帶、電視宣傳短片等,喺網上同其他新媒體,有約211萬人次睇過。
政制局亦落力推廣《基本法》,當局話2014/15年度就批出120萬元畀機構搞推廣,好似向「大中華青年在線」分別批出約20.8萬及16.7萬元,舉辦辯論比賽同4場專題講座。