中策組研討會 李細燕被當李偲嫣

李偲嫣

李細燕

【明報專訊】中央政策組前日搞咗個高層研討會，搵京官簡介總理李克強早前發表嘅《政府工作報告》，事後就傳出一個消息，令到政圈中人嘖嘖稱奇。話說呢個大型研討會，特首梁振英都到場，出席嘅都係政府高官、政界領袖同埋政府智囊，但有人發現，無官無職嘅「李偲嫣」竟然獲邀出席，仲可以提問發言?。

Emily好奇打電話問下偲嫣，但佢就話自己無去過研討會。不過，同時有多過一個出席者話明明聽到「李偲嫣」喺研討會上講嘢。Emily於是向中策組查證，佢哋都好緊張，立即翻查出席者名單，證實無請過偲嫣。Emily幾經了解，有高人終於解答疑問，原來當日發言嘅應該係金融發展局成員、香港證券學會會長李細燕，因當日發言者全部用普通話，所以大家聽到「李細燕」，就馮京當馬涼，相信係研討會人多，現場睇唔清楚李細燕個樣，所以誤以為「偲嫣出沒」。