曾俊華談仔女獲讚「快樂爸爸」
[2015.03.21] 發表
【明報專訊】財政司長曾俊華噚日去M21青協網台回答一班中學生同大學生嘅問題，講到自己留鬚嘅秘密，Emily聽完覺得佢份人都幾迷信。財爺話留鬚係因為大學時打西洋劍擊，見到最勇武、神一般嘅教練都有鬚，國際比賽冠軍絕大多數都有鬚，而電影上打劍叻嘅角色都係有鬚，所以令佢覺得有鬚就會打劍好啲。
佢仲笑住話﹕「好多做運動嘅人都有些少迷信，我仲有一件好幫得我嘅T恤，次次比賽都會着住佢。(主持人﹕有冇洗？)呢個我暫時唔講住。」
財爺喺答提問時，兩次拎自己仔女做例子，當有人問到海外實習，財爺提到個女喺大學三年級去日本京都經歷咗一年工作假期，仲話個女成日打電話同佢講日本人間屋好凍，要冚好多被。
當有人問到15年免費教育，財爺就提到自己1982年返香港時，個仔6歲，由美國讀幼稚園讀高班開始數手指，一返到香港就讀小學二年級學乘數，結果「今日為止都未追得上(數學)」。雖然好似誇張咗啲，主持人就話覺得財爺原來係一個「快樂爸爸」。
更多港聞
相關新聞
