體貼酒店防葉劉被撞
入愉景灣住兩日
【明報專訊】行政會議成員、新民黨主席葉劉淑儀大年初二喺沙田車公廟被舞麒麟嘅師傅撞倒,成為茶餘飯後話題,佢噚日喺facebook話,喺愉景灣酒店住咗兩晚休息,讚酒店可能擔心佢又被神獸「碰撞」,所以照顧體貼,例如佢一個人食飯時,酒店安排佢坐喺較幽靜嘅位置,費事又被碰撞!
葉劉仲話,睇報紙知道有啲「口痕友」話佢被撞係因為當時「唔識企位」,佢反駁指睇過新聞片段嘅朋友都知當時咁逼,無可能「揀位企」,「如我可以代替鄉紳父們老(父老們)捱了一撞,亦未嘗不是一件好事」。
沙田鄉委主席:被撞小事一樁
咁啱噚日Emily去咗沙田鄉委會嘅新年團拜,主席莫錦貴(小圖)話葉太事件只係小事一樁,反而係居心叵測嘅人大作文章。但佢證實當日冇特別邀請葉太,又話佢哋睇慣舞麒麟,都知唔會企喺「麒麟頭」附近,自己冇提醒葉太,真係「大意」,事後已託佢嘅黨友問候。另外,「發叔」劉皇發今年為香港求得中籤,莫錦貴覺得籤文為香港政改困局提供啟示,「無篩選嘅真普選只係鏡中花、水中月,貪多必失」。
佢仲話早前到沙田反自由行、水貨客嘅人係「過橋抽板」,因為以前市道唔好開放自由行,先令個市旺番,但政府亦要諗諗計,點樣減低對本地居民嘅影響。