【明報專訊】政務司長林鄭月娥噚日下晝去到立法會，同一眾議員交代第二輪政改諮詢內容，按照慣例，3司12局嘅官員都會一齊去立法會坐，以示政府一條心，不過似乎大家要撐政改都撐得幾辛苦，由林太發表聲明加埋議員發問環節大約用咗70分鐘，唔少官員睇落都好悶同眼瞓，其中保安局長黎棟國更加瞓着咗，不斷喺會議廳內「釣魚」。

譚志源紙仔傳曾鈺成

一眾官員噚日坐喺會議廳，唔知係咪因為民主派議員一早離場抗議，令答問環節無咩火花，好似財經事務及庫務局長陳家強就一路托腮，佢同財政司長曾俊華都先後忍唔住要行開一陣，唔知係咪去洗手間。主理政改嘅政制及內地事務局長譚志源，就一度寫紙仔傳畀主席曾鈺成，搞到曾鈺成立即要揭吓枱頭個大file，再寫紙仔回應佢。

至於戴住頸巾嘅黎棟國，中途更加忍唔住「閉目養神」，個頭側晒去右邊不停「釣魚」，仲試過「chok」醒咗幾次，但都繼續再瞓，歷時至少20分鐘。會議後Emily問黎局長係咪好攰呀？黎棟國只係低頭、笑而不語，保安局發言人就解釋局長病咗，食咗感冒藥令佢太攰。Emily希望局長快啲好番，唔舒服就休息吓，因為帶病當值後果可大可小。