梁太「涼薄刻毒」聲檔贏催淚彈
[2015.01.02] 發表
【明報專訊】早幾日同女兒丈夫打溫情牌、成家去食雪糕嘅特首(CY)夫人梁唐青儀，2015年剛開展就「有獎攞」。事關佢以「涼薄刻毒」批評中大學者蔡子強講佢家事嘅聲帶，喺港台「2014聲音檔案選舉」投票中得票最高，成為市民認為2014年最具代表性、印象最深刻嘅說話。
逾千市民票選
活動由1336名市民於網上投票，喺20個聲音檔案中投選10個最具代表性、印象最深刻嘅聲帶，最終齊昕嘅母親聲檔以1022票領先「9．28」發射催淚彈嘅聲音檔案，排名第一位。
舊年7月，梁太不滿蔡子強寫文談論其家事，蔡指CY早前發布一家三口合照嘅做法係「連自己女兒也不放過，在她的困難時期也要拿她來作政治公關show的人，究竟是一個怎樣的人」，其後梁太主動喺鏡頭前回應，話蔡子強嘅行為「唔止顯露出佢嘅淺薄無知，而且冷血涼薄」，又話當知道蔡係大學講師時，「不禁倒抽一口涼氣」，事後呢段說話被「惡搞」，喺網上熱傳。名列第二及第三嘅聲音檔案，分別係防暴警察於9．28發射催淚彈驅散示威者嘅聲音剪輯，及《明報》前總編輯劉進圖遇襲後以「真理在胸筆在手，無私無畏即自由」鼓勵同業。
更多港聞
【明報專訊】亞洲電視噚日起縮減新聞時段，由亞視高級副總裁劉瀾昌主持嘅議政節目《把酒當歌》播完「存貨」亦會暫講拜拜。《把酒當歌》每集有個招牌結...
詳情
相關新聞
