棄法拉利揸Mini 田少驚cut線太張揚
[2014.11.27] 發表
【明報專訊】自由黨定期會搞Social Wednesday嘅聚會，邀請唔同嘉賓同黨友、年輕人傾偈交流吓，噚晚嘅嘉賓就係自由黨田北俊。田大少呢排人氣急升，有好多人到場聽佢有咩料爆，但佢一早就同Emily講明無咩獨家料爆。不過，田少繼續金句多多，噚晚被問到下屆熱門特首人選時，就話搞普選唔係問題，「如果普選選出一個梁振英咁樣嘅人出嚟，(香港)一樣會唔掂！」
普選「選出似梁者一樣唔掂」
事緣有出席者問田少點睇政務司長林鄭月娥、前財政司長梁錦松同新民黨葉劉淑儀3個下屆特首可能人選，田少就話對佢哋各有睇法，但有記者在場就不便透露，又笑言練馬師都唔可以肯定邊隻馬會贏啦，但佢就話，如果政府聽民意，管治會好好多，所以即使有普選，但選到個好似梁振英咁嘅人，香港一樣會唔掂；即使係1200人小圈子選特首，但如果個特首和諧啲，亦未必係衰。
有人問佢覺得政改點先可以通過，田少就話，佢會同泛民講，民主派支持者嘅比例一直佔多數，所以泛民支持邊個做特首都應該會贏，既然泛民咁唔妥梁振英，只要政改方案通過，梁振英就肯定無得連任啦。
田少噚日喺立法會同Emily吹水，話近日佔中改道，佢由山頂屋企返立法會，開車只需12至15分鐘，但如果由立法會返屋企，就要成45分鐘，因為要兜好多路。Emily笑言田少揸法拉利跑車唔使怕路程遠啦，但田少就向記者透露個小秘密，話最近轉揸Mini Cooper，因為揸Mini方便佢切線，如果揸法拉利太張揚，反而唔係咁方便喎。之前有議員喺立法會外泊車被抄牌，田少亦怕怕，寧願每日畀幾百蚊，都泊入中信大廈嘅停車場。
更多港聞
【明報專訊】做警務處長原本可以為母校增光，不過近200名高主教書院嘅舊生、學生同前教職員就似乎唔係咁諗。呢班舊生、學生同前教職員噚日喺報章刊...
詳情
【明報專訊】新界青年聯會一直都係反佔中團體，但原來佢哋嘅成員都曾經深入「敵陣」，去到佔領區同參與佔領行動嘅學生傾偈，話要了解年輕人參加社運嘅...
詳情
相關新聞
