【明報專訊】一個叫「民主眞兄弟」嘅網誌前日再引述一封匿名「爆料」，公開一份聲稱「公民黨英語組」嘅會議文件，指泛民要「推學生入火坑」。不過公民黨澄清文件屬揑造，仲嘗試「捉鬼」，暫「鎖定」揑造文件嘅目標人物係一個中國籍男子。

暫鎖定全程抄寫男子

「民主眞兄弟」繼早前披露「真普聯會議紀錄」後，前日公開聲稱公民黨9月一次英語小組嘅會議紀錄，隨文附上當日會議照片，但原來係流料，公民黨即晚澄清英語小組無任何形式嘅會議紀錄，而公民黨內部翻查當日所拍得照片時，仲發現有一個參加者分外積極參與活動，全程抄寫，相信初步已掌握目標人物身分。不過究竟網誌文件會唔會係有人偷相再揑造出文件，實在難以查考。

公民黨黨魁梁家傑話，英語小組嚟緊會繼續搞。對於真普聯會議紀錄同被披露，傑哥話相信都好難追究，仲好無奈咁話唯有第日小心啲。