「公安制服」男子現港街頭
疑休班來港旅遊
[2014.07.30] 發表
【明報專訊】香港喺一國兩制下並唔容許內地公安越境執法，但Emily噚日發現網上流傳緊一張相，見到一名懷疑係內地旅客嘅男子，身穿一套「公安」制服出現喺佐敦街頭，佢件藍色恤衫嘅左臂位置，有一個印住簡體字「中華人民共和國」、「警察」、「公安」字樣嘅臂章。不過，律師同資深警員都話，現行法例針對有人擅用本港警察制服，如果只係著住其他地方執法機關嘅制服，並無犯法。
《警例》不管內地制服
根據《警隊條例》第65條，任何人擅用港警制服即屬犯罪；《簡易程序治罪條例》第21條亦規定，「任何人穿着其並無資格穿着的制服，或穿着非常類似該種制服的衣服而刻意欺騙他人」，可處罰款或監禁，但所指制服限於香港紀律部隊、英國軍隊等，對內地或其他國家嘅制服就無規限。
Emily見到上傳張相嘅網民留言話，呢個內地男子承認自己係「真公安」，可能係休班來港旅遊。據知，內地公安休班時，如果「搣」走制服上面嘅警員編號同肩章，都可以著住件制服四圍去。Emily睇張相，又真係見到呢位仁兄件制服無咗編號同肩章。
律師會副會長熊運信話，如果佢只係著住件制服周圍走，基本上無違法，除非佢自稱香港警察，或者藉住公安身分詐騙他人。有資深警員認同呢個講法，反而香港警員如果唔係出席官式訪問、到外地訓練等合理原因，而著住套制服出埠嘅話，就會違反警例。
更多港聞
【明報專訊】《主場新聞》關閉，71個前《主場》博客成立《主場新聞博客群》，繼續分享前博客新文章，另有網上廣告人就成立另一個《主場新聞 支持佢...
詳情
相關新聞
