【明報專訊】民建聯(民主建港聯盟)主席譚耀宗最近率領黨友去美國，同華僑交流，當地傳媒亦有報道，原來民建聯一行人除咗去講吓香港狀况、介紹民建聯之外，仲帶埋「反佔中」簽名表格畀當地華人簽名，相信以咁嘅規模，最終簽名反佔中嘅人數有100萬都唔出奇。不過，當地接待團體似乎唔係太認識民建聯喇，佢哋掛嘅橫額，上面大大隻字寫住歡迎「民主建國聯盟」，「建港聯盟」頓時升呢變「建國聯盟」！

民政局政助 簽名反佔中

譚耀宗等民建聯成員去咗三藩市訪問，雖然banner寫錯名，但譚耀宗等人唔介意，仲喺banner下面一齊合照，唔少網民都笑言，民建聯原來要建國，唔通佢哋要搞港獨？

民建聯去到美國都反佔中，帶晒表格畀人簽名，但早前反佔中大聯盟講明，要有工作人員蓋印，確保核對晒身分證先至計數，唔知呢類表格又計唔計喇。

本身係民建聯成員嘅民政事務局政治助理徐英偉，就緊跟黨立場，日前喺灣仔簽名支持反佔中，仲喺facebook上載相片，佢話係以個人名義簽，政府內部並無動員，但佢都好認同呢件事，所以去簽名。據知，政府內部有同問責官員講，佢地可以去簽名反佔中，但簽唔簽由問責官員自己決定。