【明報專訊】民主黨今年創黨20周年，當然要大搞，負責籌款嘅李華明(Fred)透露，今年嘅籌款目標會由去年嘅300萬增加至600萬元，嘩！增加一倍款額都只係民建聯籌款晚會嘅十分之一咋喎。 獲捐1994年紅酒賀創黨 無辦法啦，Fred話，今年晚宴會安排50圍枱，最貴嘅一圍由去年嘅3.8萬增加至5萬元，放心，酒席食嘅嘢都會「升呢」，但Fred未睇菜單。除了靠賣枱籌錢，唔少得拍賣項目，前政務司長唐英年及部分商界人士會捐紅酒，當中仲有1994年嘅年份，賀民主黨喺1994年創黨嘛。另外，去年主席劉慧卿炮製醉雞嚟拍賣，今年有機會轉轉口味，可能會自嘲一番，整番味醉鴿嚟賣，因為民主黨別名「白鴿黨」嘛。 或會賣畫 小心處理 上次民主黨拍賣國寶級畫家黃永玉作品《花鳥》，惹來涉假畫風波，Fred話今年仍會有可能賣畫，但汲取去年經驗，會小心處理。至於會請咩官員嚟，Fred話都係交畀中委會決定，去年民主黨就無請特首梁振英、發展局長陳茂波同教育局長吳克儉，因為該黨曾向上述3人提過或支持其不信任動議。 近日爆出黎智英捐款泛民政團嘅風波，咁會唔會影響到白鴿黨籌款呢？有黨員就話呢件事未必有太大影響，反而擔心10月黨慶時會撞正佔中，屆時影響可能會大啲。
|
| |
| |
;){kind=small}
;)
