由細到大，長輩常教「在家靠父母，出門靠朋友」，但原來找熟人租屋都可以中伏。Yvonne初來報到，諗住和男朋友一家同住，信得過而無需簽約，但最終都淪落到被既是屋主也是男友父母勒令七日內搬走，結果雙方反面，更要在未來老爺奶奶面前與他們的乖仔一起搬行李走人。
地產經紀Stephen提醒大家，就算關係再好，都應該簽《住宅租賃協議》自保，否則一旦出事，經紀律師都幫不了忙，輕則損失按金，重則被臨時趕走，求救無門。
以為租熟人地方不用簽約 室友夾新女友趕自己走
初來加拿大報到的Yvonne與三位朋友決定共租其男朋友父親的房子。房子不大，但勝在屋主為熟人、信得過。雖然無白紙黑字簽下租約，但大家亦約法三章、立下共住規矩。Yvonne與其中一位女朋友合租主人房，每月租金$1200，一切看似安穩，直到「好兄弟」Jack認識了阿May。
起初大家都以為阿May只是偶爾探訪的「朋友」，但很快地，她的出現變得比業主還頻繁。明明共住條款早有列明，帶人過夜需提前通知，但所謂「戀愛中的人最易失憶」，Yvonne幾次替朋友掩護，連業主問起都幫口遮掩，結果換來的卻是竟是一句冷嘲熱諷。
「阿May諗住幾時搬入來住？」Yvonne某次半開玩笑一問，阿May竟回：「你幾時搬走咪幾時搬入來囉。」語氣之直白，令人啞口無言。
這一刻Yvonne才恍然，自己從來唔係阿May眼中的室友、甚至連存在感都未被認可。更難堪的是，Jack這位好兄弟似乎在戀愛中失去判斷力，非但無替Yvonne緩頰，反而愈走愈遠，不但默許阿May三番四次遊說他「趕走Yvonne」，還趁她外出時偷偷向業主投訴Yvonne「唔做家務」、「唔合作」，轉頭卻猛讚阿May係「虔誠教徒」、「有家教」、「適合做室友」，試圖替她鋪路上位。
「阿May其實從來都唔係教徒，甚至無返過教會。」Yvonne無奈地笑說。
事態到此，已非單純的室友摩擦。業主誤信了Jack的說法，在晚飯期間突然落重手，向Yvonne與其女室友發出「最後通牒」，七日內搬走或者讓出主人房予Jack與阿May，遷往地庫房間，並加至$1600月租。
Yvonne一眼望落地庫，房間狹小、光線差不說，連租金都比原來更高，心中忽然醒覺，根本是以價錢逼人走。「都唔使講啦，佢根本就係唔想再租比我們。」更令她心寒的是，男朋友完全沒有出聲為她平反，只輕描淡寫地提出：「可唔可以比多幾日時間搵地方搬？」
眼見局面已無回頭路，Yvonne明白，留下只會更難堪。她選擇收拾行李，另覓出路。
但她的女室友就沒那麼堅強，一聽業主要人走，即刻情緒崩潰。「我們先剛剛settle下來咋！」女室友情緒失控，整晚驚恐痛哭，甚至出現驚恐發作(Panic Attack)，因喘唔過氣需深夜求醫。待情緒稍穩，她情緒化地怒斥Yvonne：「其實一早就應該要簽約！」
屋主賠了租客又失兒子
事後，Yvonne曾向公司同事訴苦，同事亦熱心幫忙找樓。她曾經看過一間Don Mills的Basement，租金雖然非常吸引，但格局卻極其古怪：客廳闊落，房間卻小得可憐，更糟的是濕氣重重，空氣中瀰漫一陣發霉氣味，令她直言「住唔落去」。
幸好在限期前一週內，Yvonne成功搵到新住處。同樣是地下室單位，但擁有明亮窗戶，房間大小與原來主人房相若，租金為$1650，不但比原本屋主開價的地庫房更便宜，生活質素亦大大提升。
但由於新屋簽約時需要有穩定收入證明，Yvonne便找來自己的男朋友擔任連署人，協助她完成租約申請。當所有鎖匙交接、家俱搬入後，她男朋友亦決定離開家庭，搬入與Yvonne同住。消息傳到屋主耳中，亦即她男友的父親，對方只得無奈嘆一句：「仔大仔世界啦。」Yvonne則坦言：「如果屋主唔係誤信饞言，我們都唔洗當住佢父母面前，搬佢個仔既行李走。」
再熟悉都要簽約保護自己
地產經紀Stephen Au-yeung指出，這次事件正好說明，「租屋簽約唔係多此一舉，而係保命之舉。」他強調：「唔係話口頭承諾完全無效，但你要諗一件事點樣執行？」
例如，如果一日屋主話「傾好左租半年」，但你堅稱係一年，就算你有交租記錄都未必幫到你。因為「無寫低，就變空講一場。」他補充一些更細微的規定，例如按金數目、退租通知期等，若無列明在合約中，一旦雙方談判無共識，$1000秒變$300，最終只能口同鼻拗。
Stephen更分享自身經歷：「我有個客，貪平搵私租，冇簽租約。住了一陣之後同屋主相處唔愉快，屋主即刻趕人走。個客半夜打畀我求救，但無租約在手，我想幫都唔知點入手。」
雖然如此，他亦提醒租客不需要過份恐慌，即使無簽約，屋主都不可以立刻搬走行李、趕你走。「如果你一直有交租，有住開的地方，就算係口頭協議，屋主一朝趕你走，仲將你的物品扔晒出街，其實都有機會違法。」但若果屋主選擇報警，聲稱你「非法佔用」，而你又無法證明你有租住權利，最終都可能落得「雙輸收場」。
對新移民來說，最基本的自保方法就是簽署《住宅租賃協議》（Residential Tenancy Agreement，簡稱RTA）。這份由安省政府制定的標準格式租約，用字簡明清晰，專為保障租客與業主雙方而設，內容包括租金金額與支付方式、租期長短、水電費用安排、是否准許養寵物或吸煙，以及維修責任劃分等，讓雙方都「講得出、數得清」。對英語能力有限或初來乍到的港人來說，這份標準租約不但易於理解，亦有效防止簽下不合理或違法條款，例如強收清潔費、過高罰金，甚至誤墮「非法押金」陷阱。
所謂白紙黑字講明白先無誤會，就算是熟人介紹、朋友一起租住，紙筆記錄、簽名，才是對自己最基本的保障。在異地生活，感情可以慢慢建立，但法律保護不能靠信字行先。
