8強大軍出爐 英法克抗悶戰 穩守vs.娛樂性 巴西比利時難抉擇

當英軍能夠射贏12碼，爆出世界盃歷來最大冷門，誰還需要更出乎意料的戰果，偽正義地扮鋤強扶弱？大眾眼中的勁旅之所以是勁旅，主因乃這些隊伍大部分時間有意欲踢進攻足球、有條件踢漂亮足球，因此，替普羅觀眾着想，今屆4強要避免悶波，英格蘭、克羅地亞與法國均需列席，唯一可以斟酌為巴西與比利時之選擇。

傳統上，足球王國從不缺一流攻擊球員，繼而予人單靠強大火力搵食的印象，但正如柏高4年前指出，森巴兵團比其他國家隊優勝之處，實為戰術組織，特別是守備結構，讓前線可安心地、自由地發揮。講到1958年太遙遠，惟2002年基拔圖施華搭基巴臣的雙防中3-5-2，稍具資歷的球迷大抵尚有印象吧。防守方為爭標王道的這份認知，今屆依舊延續。

現時巴西的4-3-3，由原本中場線全屬防中或工兵，來到世盃臨近才因連拿度奧古士圖帶傷狀態差，把菲臘比古天奴自右翼移往習慣的左中場，但為平衡防務又用上韋利安。從戰術角度，韋利安最明顯作用只有防守紀律，使森巴軍無球在腳時維持4-4防禦陣形，最孭飛的尼馬能專注攻堅。如此部署，犧牲了進攻的恆常流暢(尤其是尼馬經常hold波太耐)，偏偏吹佢唔脹嘅係，一眾球星(包括後備)總在適當時機貢獻moment of magic，全場僅一兩腳好波就夠贏。相比之下，比利時的創造力堪稱今屆首屈一指，夏薩特與奇雲迪布尼製造攻勢的效率，將尼馬與古天奴也比下去。問題在於，其實都講足幾年，防中與兩閘的漏洞未真正解決，反過來限制了攻兵的演出，尤以迪布尼為甚。柏高沒有半點不敬意思，可是連日本也入到比利時2球，歐洲紅魔實在未達捧盃的級數——儘管佢哋入得又失得的較開放取向，娛樂性肯定高過巴西。

法國不變應萬變 俄羅斯恐到盡頭

柏高的設想為，比利時會否參考法國執過個陣，改打4-2-3-1解放迪布尼？當然這涉及冒險的系統轉換大工程，相對地法國則只微調攻擊套路，用番基奧特替後上隊友開路駁腳。近2仗針對對手右側進攻而用的馬度迪明天8強停賽，換上哥倫天杜利素或尼桑斯都沒問題，純粹視乎教練迪甘斯想較進取定穩陣，反正烏拉圭都是獨沽一味防反。即使難以期望基利安麥巴比再獲大量空間屈速狂爆，惟法國應有足夠火力打穿龜殼——起碼主觀願望如此。

無法理解中立球迷上一圈支持俄羅斯淘汰西班牙的邏輯。破敵板斧全無、一心博射極刑兼靠主場雞，這支俄軍衰啲講句，就係衰過02年韓國。就算克羅地亞也非好波保證，但西班牙圍搓、格仔軍防反，一定好睇過克國被迫主動、俄佬繼續死守(係冇得反嘅)。如今無可奈何，請東道主做番觀眾罷啦。

三獅對瑞典料佔上風

同樣道理，下線有能力主攻的僅餘英軍，沒道理撐瑞典，何况瑞典的防反也不出色，16強跟瑞士合演悶波乃早已料到的本性難移。周二當哥倫比亞好好哋用波兼改用3-5-2時，英軍即受壓失勢，惟瑞典不具備哥國的技術水平，亦慣用4-4-2，正合英軍3-5-2中場快速入楔的基本踢法，三獅兵最須防範的僅為second ball執漏而已。